Zuidenburg Produksies bied in samewerking met Pierneefteater ‘n aanlynkonsert aan.
Die kunstenaars wat gaan optree, is Christo Bezuidenhout (orrel en klavier), Lorette Theron (fluit), Carla van Veenendaal (fluit), Jan-Willem Hoorweg (fagot) en Ellen van Eyk-Potgieter (sopraan). Almal is musikante wat lekker saamwerk en musiek maak.
Christo Bezuidenhout is die inspirasie agter hierdie konsert en die man agter Zuidenburg Produksies. Christo het ‘n paar vriende nadergewink vir hierdie konsert en ou persoonlike gunstelinge is afgestof en opgeneem. Grendeltyd het meegebring dat saam musiekmaak nie kon plaasvind nie en hierdie konsert het die geleentheid gebring om ten minste weer te kon saam musiseer, alhoewel ‘n meelewende, lewendige gehoor steeds buite die kwessie is.
Christo het geleentheid gekry om sy slag met improvisasie agter die orrel en as musiekverwerker te wys. Lorette en Carla kon weer saamspeel as duetgroep, Jan-Willem en Ellen kon saam met Christo se fyn aanvoeling as begeleier ook bydra tot die geleentheid. Komposisies van uiteenlopende genres van Antonio Vivaldi, Karl Jenkins tot Coenie de Villiers en Johan van Rensburg is op hierdie program geplaas..
MORE ABOUT THE ARTISTS Gisela de Villiers Meer oor die kunstenaars:
Christo Bezuidenhout het vanaf 5-jarige ouderdom himself begin leer speel op die klavier. Vanaf die ouderdom van 6 het hy klavierlesse geneem. Tydens sy hoërskooljare het hy deelgeneem aan etlike klavier- en orrelkompetisies. Ook gedurende hierdie tyd het hy begin werk aan eie komposisies en musiekverwerkings. Tydens sy matriekjaar slaag hy die Unisa praktiese eksamen vir klavier met lof. Ander instrumente tydens hoërskool jare was kerkorrel, sang, en selfs viool vir 3 jaar. In 1993 het hy B.Mus begin studeer aan die Universiteit van die Vrystaat met klavier en orrel as hoofvakke. Christo woon vanaf 2008 in Johannesburg, waar hy werk as orrelis by die NG Gemeente Weltevreden. Hy bedryf ook sy eie musiekproduksie-onderneming, waar hy spesialiseer in die vervaardiging van klankbane, klankopnames, klankredigering en nog meer. Hy doen ook lewendige musiek by verskeie funksies, begelei ‘n paar skoolkore, asook oorspronklike toonsetting en komposisie. Tans is Christo ook besig met opnames vir ‘n klassieke orrel-cd, wat binnekort vrygestel sal word.
Lorette Theron het Sielkunde by die Universiteit van Stellenbosch studeer en gedurende haar studentedae fluit by Eva Tamassy geneem. Sy is nou 'n Bedryfsielkundige en het oor die jare in verskeie kamerorkeste, simfonieorkeste en jazz-orkeste gespeel. Sy is tans lid van die Johannesburgse Simfonie-Orkes.
Carla van Veenendaal het regte studeer aan die Randse Afrikaanse Universiteit en volg tans ‘n regsberoep. Sy het Graad 8 Royal Schools behaal as leerling van Denise Brinkman. Sy het in verskeie amateurorkeste gespeel en is tans lid van die Johannesburgse Simfonie-Orkes. Sy speel ook dikwels saam met Christo Bezuidenhout by troues, onthale en so meer. Carla en Lorette Theron het al verskeie kere opgetree in duetkombinasie. Sy is ook tans 'n beginner fagotspeler en leerder van Jan-Willem Hoorweg.
Jan-Willem Hoorweg is gebore in Nederland, maar het in Suid-Afrika grootgeword. Hy het vir 'n BA graad gestudeer aan die Universiteit van Suid-Afrika, met hoofvakke Geskiedenis en Duits, maar gou besef dat sy liefde vir musiek baie groter is. Na jarelange betrokkenheid by militêre orkeste het hy vir bykans 10 jaar in die Nasionale Kamerorkes gespeel as eerste fagottis. Sedert 2000 was hy aktief gewees in die plate-industrie, by Gallo Record en Next Music, en sedert 2014 is hy as vryskutmusikant deel van verskeie ensembles en kamermusiekgroepe. Hy is lief vir lesgee op alle vlakke, en was in 2007 ook gasdosent in fagot aan die Universiteit van Pretoria. In sy vrye tyd is hy 'n langafstand atleet, natuurliefhebber en 'n entoesiastiese krygsgeskiedkundige.
Ellen van Eyk-Potgieter het musiek aan Nelson Mandela Metropolitaanse Universteit studeer. Sy het haar M.Mus-graad behaal met hoofvakke klavier en sang en sy het ook aan dieselfde Universiteit doseer. Sy was dosent by Goudstad onderwyskollege, Wits en Soweto Onderwyskollege. Ellen het opera gesing en rig kore af. Sy komponeer en verwerk graag koormusiek.
