Die sensuele musiekpaar Coffee Snobs, in samewerking met die bekroonde skrywer/digter Riana Scheepers, neem die gehoor op ’n liriese reis van uitsonderlike digvorme. 

Donkernagpantoen – Die reis van vers na liriek wys op ’n opwindende manier hoe tradisionele digterlike vorme deur musikale verwerking nuwe dimensies van skoonheid, ontroering en verwondering verkry. 

Die genres wat getoonset en gesing word, is onder meer die enigmatiese pantoen, ’n meesleurende wiegelied en ’n broeiende villanelle – en vir afwisseling ’n tranetrekkende smartlap en ’n outentieke Kaapse moppie. Ander digvorme wat ook opgevoer word, is ’n ode, ballade, parodie en ’n lament. 

Die doel van die produksie is drie-ledig: Nie net word pragtige musiek en liriek van ’n uitmuntende gehalte aan die gehoor bekend gestel nie, maar bykans vergete digvorme soos die pantoen, villanelle en sestina word opnuut in die kollig gestel.

Donkernagpantoen bewys dat hierdie “argaïese” digvorme steeds vars,modern en vonkelend is – en by uitstek geskik om gesing te word