Die eggo van jou oë sou gedurende Maart 2020 deel van die KKNK in Oudtshoorn gewees het, maar nou het Jannie besluit om, soos talle ander kunstenaars in hierdie dae, die konsert na jou eie sit-, eet- of slaapkamer toe te bring – selfs na jou lapa toe as jy wil!
In hierdie kuberkonsert sing Jannie, wat hom nou reeds byna vyftig jaar in Afrikaanse musiek uitleef, sy hartsmusiek. Daar is liedjies van sy onlangse albums soos Die eggo van jou oë met hoogtepunte uit sy loopbaan en Oesjaar met sy eie splinternuwe komposisies, maar ook gunstelinge uit sy jeugjare soos die pop- en folk van die sestiger- en sewentigerjare.
Daarby is Jannie natuurlik bekend vir sy uitsonderlike weergawes van Afrikaanse en Europese kleinkuns: Die program omvat letterlik Donovan tot by Doep, die Beatles tot by Brel. Die merkwaardige verskeidenheid van die program word ‘n sprankelende vertoonvenster vir sy ensemble van instrumentaliste uit die boonste rakke.
Jannie du Toit – sang en kitaar Susan Mouton (tjello) Chanie Jonker (klavier en akkordeon)
